مەملەكەت باسشىسى قاسىم-جومارت توقايەۆتىڭ جارلىعىمەن قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسى قۇرىلاتىن بولدى. ءقازىر  پرەزيدەنت اكىمشىلىگىنىڭ وكىلدەرى  ساياسي پارتيالار، ۇكىمەتتىك ەمەس ۇيىم باسشىلارىمەن، ازاماتتىق سەكتور جانە قوعام بەلسەندىلەرىمەن كەڭەستى قۇرۋ جانە قالىپتاستىرۋ جونىندە تالقىلاۋ وتكىزۋدە.

پرەزيدەنت توقايەۆ اتاپ وتكەندەي، جاڭا ورگان بيلىك پەن قوعام اراسىندا ديالوگ ورناتۋ ءۇشىن قۇرىلادى. كەڭەسكە جاستاردى قوسا العاندا بارلىق قوعام وكىلدەرى قاتىسادى. پرەزيدەنت توقايەۆ ۇلتتىق قوعامدىق سەنىم كەڭەسىنىڭ العاشقى وتىرىسى 2019 جىلدىڭ تامىزىندا وتەتىنىن اتاپ ايتتى.

–مەن قوعامدىق كەلىسىم ۇلتتىق كەڭەسىن قۇرۋعا شەشىم قابىلدادىم. كەڭەس قۇرامىنا قوعامداعى بارشا تاپتىڭ وكىلدەرى، سونىمەن قاتار، جاستار كىرەدى. جاڭا ورگاننىڭ العاشقى وتىرىسى تامىز ايىنا جوسپارلانعان. بيلىك حالىق الدىنداعى ۋادەسىن ورىنداۋى ءتيىس، - دەدى پرەزيدەنت.

سونداي-اق قاسىم-جومارت كەمەل ۇلى "استانا وپەرا" تەاترىنىڭ عيماراتىندا ورنالاسقان سايلاۋ ۋچاسكەسىنە 9 ماۋسىم كۇنى داۋىس بەرۋگە كەلگەن كۇنى دە ەلدى اۋىزبىرشىلىككە شاقىرىپ، كەز-كەلگەن وپپوزيسيالىق كۇشپەن جانە جاستارمەن اشىق ديالوگ وتكىزەتىنىن تاعى ءمالىم ەتتى.

– مەن جاستار ساناتىنا كىرەتىندەردىڭ بارلىعى حالقىمىزدىڭ الدىندا تۇرعان ماڭىزدى ماسەلەلەردى شەشۋ جولىندا بىرىگەتىنىنە سەنەمىن. الەم تۇراقسىز بولىپ بارادى. سوعان قاراماستان، ءبىز ادامداردىڭ پىكىرىنە قۇرمەتپەن قارايمىز. ءبىز بيلىككە قارسى ادامدارمەن دە، قولدايتىندارمەن دە اشىق ديالوگ جۇرگىزۋگە دايىنبىز.  كەشىرىلمەيتىن قىلمىستار دا بولادى، ارينە. ءبىراق پىكىر ايتۋعا بارلىعى قۇقىلى. مەن جاستاردى بيلىك باعىتىنا سابىرمەن قاراۋعا شاقىرامىن. ءبىز ەلىمىزدى دامىتۋ ءۇشىن ءبارىمىز ءبىر بولۋىمىز كەرەك، اشىق ديالوگتار ۇيىمداستىرۋىمىز كەرەك"، - دەدى پرەزيدەنت.

شىندىعىندا دا قازاقستان حالقىنىڭ باسىم بولىگىنىڭ داۋسىن الىپ، قىزمەتىنە كىرىسكەن توقايەۆتىڭ بۇل باستاماسى وتە دۇرىس. ەلدى مامىلەگە شاقىرعان قاسىم-جومارتتىڭ بۇل باستاماسى قوعامنان قولداۋ تاپتى. قازىرگى ۋاقىتتا بارلىق دەڭگەيدە تالقىلاۋ جۇمىستارى جۇرگىزىلۋدە. ۇسىنىستار مەن پىكىرلەردى پرەزيدەنت اكىمشىلىگىنىڭ وكىلدەرى ەسكەرۋدە. ارقايسىسىمەن كەزدەسۋ وتكىزۋدە. بۇل ارينە  ەلىمىزدە ازاماتتىق قوعامدى قالىپتاستىرۋ مەن دامىتۋ ءۇشىن وتە كەرەك.

جاستاردان جاڭاشىلدىق كورىپ، ولاردىڭ مەملەكەتتى دامىتۋعا قاتىستى پىكىرىن ءبىلىپ، سەزىپ وتىرعان توقايەۆتىڭ بۇل قادامى قۇپتاۋعا تۇرارلىق. بۇل ەلدى جاڭاشا قۇرۋعا ارنالعان بەتبۇرىس دەپ اتاۋ كەرەك.

دۇرىس. قوستايمىز. ءبىراق اتالعان كەڭەستىڭ مارتەبەسى قانداي بولۋى كەرەك؟ وعان كىمدەر كىرگەنى دۇرىس؟ بۇل – ەڭ باستى ماسەلە. تاعى وعان قارتايعان "قايراتكەرلەر" كىرە مە؟ مۇنداي كەڭەسكە ەلدىڭ مۇڭ-مۇقتاجى مەن  ءسوزىن ايتاتىن حالىق وكىلدەرى ەنۋى ءتيىس. تامىزدا وتىرىسى باستالاتىن كەڭەس شىن مانىندە ەلدىڭ سەنىمىنە يە بولۋى قاجەت. بۇل كەڭەسكە ايتارىن ايتىپ بولعان باتا بەرگىش شالدار مەن كوممۋنيزم ءداۋىرىن كورگەن قاراساقالداردى مۇلدە كىرگىزۋگە  بولمايدى.

ەل جاستارى نەنى قالايدى، ورتا بۋىنداعى ازاماتتاردىڭ كوزقاراسى قانداي؟ ولار ەلىمىزدىڭ دامۋىن بولاشاقتى قالاي كورگىسى كەلەدى؟ مۇنىڭ بارلىعى كەڭەستە اشىق تالقىلانىپ قانا قويماي، تاياۋ بولاشاقتا جۇزەگە اسۋى قاجەت.  سوندىقتان بۇل كەڭەستە حالىقتىق وكىلدەردىڭ، كرەاتيۆتى جاستاردىڭ كوبىرەك بولعانى ءجون جانە تالقىلانعان جايتتاردىڭ جۇيەلەنىپ،  جۇزەگە اسقانى دۇرىس.

مامىلەگەر ساياساتكەر پرەزيدەنت توقايەۆ ايتقان ءسوزىن ورىندايدى جانە كەڭەستە تالقىلاناتىن حالىقتىق  پىكىرگە قۇلاق اسادى دەپ ويلايمىز.